Hoxe acercámosvos unha ruta que era ideal para os máis pequenos porque a cada paso que dabas podías ir descubrindo algo segredo: un gnomo, un ananiño, unha casiña...
Na actualidade e despois das fortes choivas deste outono non queda practicamente nada de todas esas figuriñas que facían o camiño máis divertido para os pequenos, aínda así é un paseo recomendable.
Esperemos que retomen a iniciativa o máis rápido posible porque é unha verdadeira pena que despois de meses non se arranxara.
A Ruta dos Muíños está no Concello de Xove e parte exactamente de Regosanguento, na parroquia da Rigueira e remata na Igrexa de San Miguel desa mesma parroquia.
Todo o camiño discorre á beira do río e pódense ver varios muíños e animais nas fincas próximas.
Pouco tempo despois de empezar chegamos unha fermosa área recreativa. Si a ruta se fai ao revés (desde a Igrexa) pode coincidir moi ben para descansar.
A ruta é sinxela e a súa lonxitude total é duns 4 quilómetros sen subidas nin dificultades. Ideal para dar un paseo con nenos!
Ao chegar á Igrexa atópase outra área recreativa con auga, forno, mesas e algún accesorio infantil. Todo o necesario para un descanso. Animádevos! Nós seguiremos dando voltas!
Ningún comentario:
Publicar un comentario